आगामी ७ दिनभित्रका चाडपर्व र उत्सव तथा शुभ मूहुर्त : २८ गते : विजया एकादशी व्रत, मूहुर्त : रुद्राभिषेक(रुद्रीपूजा), अग्निवास(होमादि), कलशचक्र, २९ गते : देवघाटमा मकरस्नान र माघमेलाको समाप्ति, मूहुर्त : रुद्राभिषेक(रुद्रीपूजा), कलशचक्र, ०१ गते : फाल्गुन सङ्क्रान्ति, महाशिवरात्री, भौम प्रदोष व्रत, पिण्डेश्वर धाम (धरान, सुनसरी), हलेसी महादेव, पशुपतिनाथ लगायत समस्त शिवालय र शिवमन्दिरमा उत्सव, जात्रा, मेला आदि, शिलाचह्रेपूजा (नेवारी पर्व), मूहुर्त : रुद्राभिषेक(रुद्रीपूजा), अग्निवास(होमादि), कलशचक्र,

०२ गते : सहिद लखन थापा स्मृति दिवस, मूहुर्त : दैलो राख्ने, पुराणश्रवण, ०३ गते : अमावस्या, दर्शश्राद्ध, हलो तथा निशि बार्ने दिन, द्वापर युगादि, धनिष्ठा पञ्चक प्रारम्भ, मूहुर्त : अग्निवास(होमादि), दैलो राख्ने, पुराणश्रवण,०४ गते : ग्याल्पो ल्होसार, मूहुर्त : अग्निवास(होमादि), चूडाकर्म(छेवर), कर्णवेध(कान छेड्ने), द्रव्यप्रयोग वा लगानी, डेरा सर्ने, ०५ गते : चन्द्रोदय, त्रिपुष्कर योग दिनको ११।०८ देखि मध्यरात्रीपछि ०४।०२ बजेसम्म, मूहुर्त : रुद्राभिषेक(रुद्रीपूजा), द्रव्यप्रयोग वा लगानी

साप्ताहिक राशिफल
(वि.सं. २०७४ माघ २८ गतेदेखि वि.सं. २०७४ फाल्गुन ०५ गतेसम्म)

मेष (चु, चे, चो, ला, लि, लु, ले, लो, अ)
भाग्यस्थानमा रहेको चन्द्रमाका साथमा तपाईंको यो साता प्रारम्भ भएको छ । त्यसैले इष्टमित्रले तपार्इंको प्रशंसा गर्नेछन् । परोपकारका क्षेत्रमा आकर्षण बढ्ने छ । अप्रत्याशित काम बन्ने योग छ । पारिवारिक जीवन सामान्य रहने छ । इच्छाएको जिम्मेबारी प्राप्त हुनसक्छ । तर खानपानमा खर्च गर्न मन हौसिन्छ । कर्मक्षेत्रमा पनि विशिष्ट फल प्राप्त हुने संकेत छ, खासगरी पशुपालक र दुग्धव्यवसायमा संलग्नहरूले मनग्ये लाभ प्राप्त गर्नेछन् । विशिष्ट व्यक्तिको सहयोग र सल्लाहले स्वास्थ्य र कर्मक्षेत्रमा सकारात्मक सङ्केत देखिने छ । घरपरिवारमा राम्रो छ । भाइबहिनी वा सन्ततिका तर्फबाट खुशीको खबर प्राप्त हुने छ । साथीभाइ र नातेदारबाट उपयोगी सल्लाह र सहयोग प्राप्त हुनेछ । शारीरिक प्रतिस्पर्धाका कामतिर मन जानेछ । त्यसैले यतिबेलाको समय विगतका कमीकमजोरी सम्झने समय होइन, आत्मबल र हिम्मत जुटाएर काम गर्ने समय हो । राज्यपक्षबाट लाभ प्राप्त हुनेछ ।

बृष (इ, उ, ए, ओ, बा, बि, बु, बे, बो)
तपाईंको राशिबाट आठौं भावमा रहेको चन्द्रमाको प्रभावका साथ साताको प्रारम्भ भएकाले त्यति सकारात्मक समय देखिंदैन, साताको प्रारम्भमा नै पाचन प्रणालीमा आएको खराबीले तपाईंलाई निराश तुल्याउन सक्छ । पारिवारिक समस्यालाई हल गर्न तल्लीन हुनुपर्ने छ । बौद्धिक र प्राज्ञिक क्षेत्रमा समेत खिन्नता बढ्नेछ । चिन्ता, शंका र छटपटीमा यो साता व्यतीत हुन बेर लाउँदैन । तर अत्तालिनु हुँदैन, मङ्गलबार भाग्यस्थानमा चन्द्रमाको प्रवेश हुँदैछ, हातमा अचानक सोच्दै नसोचेको धन प्राप्त हुनसक्छ । मित्रवर्ग र बन्धुवान्धवले राम्रो सहयोग प्रदान गर्नेछन् । कतिपय राम्रा अवसर प्राप्त गर्नुहुनेछ । आफन्त र मित्रहरूसँग भेटघाट र रमाइलो गरिने छ । उता साताको अन्त्यमा कर्मक्षेत्रमा चन्द्रमाको प्रवेश हुँदैछ, त्यसैले विभिन्न जिम्मेवारी निर्वाह गर्नुका साथै दौडधूप गर्नु पर्नेछ । यात्रा रमाइलो हुनेछ । साताको प्रारम्भको तुलनामा उत्तराद्र्ध असल छ । तर साताको प्रारम्भमा स्वास्थ्यमा अचानक सानो समस्या देखिन सक्छ । समग्रमा मिश्रित प्रभाव भएको साता छ, तर सुआफन्तहरूबाट भनेजस्तो सहयोग नपाइएला, तर काममा बाधा हुनेछैन ।

मिथुन (का, कि, कु, घ, ङ, छ, के, को, ह)
मिथुन राशिका जातकहरुका लागि कतै रमाइलो र कतै नरमाइलो अर्थात् उतारचढावले युक्त रहने छ, यो साता । सुरुमा सातौं भावमा चन्द्रमाको प्रभाव रहने छ, , त्यसैले महत्त्वपूर्ण आर्थिक समस्याहरु निराकरण हुनेछन् । समय चुनौती र परीक्षणका रूपमा देखिएको भए पनि बन्दव्यापार र साझेदारीबाट राम्रो प्रतिफल प्राप्त हुनेछ । तर मंगलबारपछि हडबड र शीघ्रताले काम गर्ने प्रवृत्तिमा नियन्त्रण गर्नु राम्रो हुन्छ । साताको मध्यभागमा आठौं भावमा चन्द्रमा रहने छ, त्यसैले स्वास्थ्यमा गडबडी हुनसक्छ र दैनिक कामकाजमा समेत असर पर्नसक्छ । अनाहकमा अरुले गरेका गल्तीको सजाय पनि आफैंले भोग्नु पर्ने अवस्था आउला । बोलेको कुराले विपरीत अर्थ प्रदान गर्न सक्छ । नातागोताका माझमा खटपट बढ्ने संकेत छ । साताको अन्त्यमा भाग्यस्थानमा चन्द्रमा भए पनि आफू जिम्मेबार भएर अघि बढ्नु जायज हुनेछ, जीवनसाथी वा बालबच्चासँग कुराकानी गरी व्यवहारिक जानकारी लिनु असल हुनेछ । आफूमुनिका नातेदार वा बालबच्चासित राम्रो व्यवहार गर्नुहोला । इष्टमित्रको शुभकामना प्राप्त गर्न सकेमा शुभफल प्राप्त हुनेछ । समग्रमा साताको मध्यभागबाहेक अन्य समय अनुकूल नै रहने देखिन्छ ।

कर्कट (हि, हु, हे, हो, डा, डि, डु, डे, डो)
यो साता मिश्रित र तनावपूर्ण समय रहने छ, किनकि साताको प्रारम्भमा छैटौं घर अर्थात् लडाइँ, झगडा, वादविवाद र रोगसँग सम्बद्ध घरमा अनि साताको अन्त्यमा आठौं घर अर्थात् दुर्घटना र संकटसित सम्बन्धित घरमा चन्द्रमाको उपस्थिति हुनेछ । तर साताको मध्यभागमा मनोरञ्जन र रामरमाइलो प्रदान गर्ने सातौं घरमा चन्द्रमा रहने छ । त्यसैले सुरुमा पाचनप्रणाली र नसासम्बद्ध रोगले दुःख दिन सक्छ । दृष्टिशक्तिमा कमी आउन सक्छ । व्यवहारिक समस्याले अवरोध हुने सम्भावना हुन्छ । उता साताको अन्त्यमा स्वास्थ्यमा अचानक गडबडी हुने र सानोतिनो चोटपटक लाग्ने सम्भावना पनि हुनेछ । त्यसैले यो साता हातहतियार चलाउँदा, बाटो काट्दा र खानपान गर्दा अलि होस राख्नुपर्छ । तर साताको मध्यभाग अर्थात् मंगलबारदेखि बिहिबारसम्म शरीर फुर्तिलो हुनेछ, जोस र जाँगर बढ्नाले आम्दानीमा समेत बढोत्तरी हुनेछ । अभिभावकवर्गको आशीर्वाद प्राप्त हुनेछ । राम्रो समाचार सुन्न पाउनु हुनेछ ।

सिंह (मा, मि, मु, मे, मो, टा, टि, टु, टे)
बुद्धिक्षेत्रमा रहेको चन्द्रमाका साथमा यो साताको प्रारम्भ हुँदैछ । घरपरिवारमा खुसीको वातावरण सिर्जना हुनेछ । आत्मविश्वास र शीघ्र निर्णय गर्ने क्षमता अभिवृद्धि हुनेछ । रोकिएका काम सम्पादन हुनेछन् । पढाइमा पनि राम्रै प्रगति हुनेछ । कसैलाई ज्ञान र अर्ति दिनुभयो उसले लाभ पाउने छ । साताको अन्त्यमा दूरदर्शिताको सर्वत्र चर्चा हुनेछ । मायाप्रेम र भावनात्मक क्रियाकलापमा समय व्यतीत हुनेछ । विपरीतलिङ्गी सहयात्रीबाट प्राप्त सल्लाहबाट गरिएको कामबाट फाइदा हुनेछ । सन्तानपक्षको राम्रो माया मिल्नेछ । तिनीहरुका उन्नतिप्रगतिका समाचार सुन्न पाउनाले मन हर्षित र आनन्दित बन्ने छ । साताको मध्यभागमा भने छैटौं भावअर्थात् रोगसँग सम्बन्धित घरमा चन्द्रमा रहने भएकाले खानपान र आहारविहारमा विशेष ध्यान पुर्याउनु वाञ्छनीय हुनेछ । उक्त अवधिमा प्रतिस्पर्धीहरूले औंला ठड्याउने अवसर पाउने छन् । त्यसैले आफूले नडराई र नबिराइकन काम गर्नुपर्ने परिस्थिति छ । खासगरी मंगलबारदेखि बिहीबारसम्म आमाको स्वास्थ्यप्रति पनि सचेत रहनु राम्रो हुन्छ ।

कन्या (टो, प, पि, पु, ष, ण, ठ, पे, पो)
सुरुमा घरपरिवारमा ध्यान दिनुपर्ने समय चल्दैछ, चौथो भावमा चन्द्रमा छ, त्यसैले घरायसी समस्याहरु उत्पन्न हुन सक्छन् । घरायसी समस्याका कारण दौडधूप गर्नुपर्ने परिस्थिति बन्नसक्छ । कामधन्दा र पारिवारिक समस्यामा केन्द्रित हुनुपर्ने भएकाले साथीभाइलाई समय दिन वा बन्दव्यापारका लागि फुर्सद निकाल्न सकिंदैन । सामाजिक र परोपकारका मार्गमा अवरोध हुनेछ । मङ्गलबारपछि उताको समय राम्रो छ, बुद्धिक्षेत्रमा चन्द्रमाको प्रवेश हुनेछ, कल्पना र भावुकतामा रमाउँदा रमाउँदै समय गएको पत्तो पाउनुहुन्न । छोराछोरीबाट सन्तोष प्राप्त हुनेछ । आफैंले गरेको निर्णयबाट लाभ प्राप्त हुने छ । साताको अन्त्यमा भोगविलासमा आकर्षण बढ्न सक्छ, विलासिता र मनोरञ्जनका लागि समय र धन खर्च हुनसक्छ । तर छैटौं भावमा चन्द्रमा रहने भएकाले आमा वा मामाको स्वास्थ्यमा नकारात्मक असर पर्न सक्छ । यस अवधिमा तर्क, विवाद र झैझगडाबाट टाढा रहनु राम्रो हो ।

तुला (र, रि, रु, रे, रो, ता, ति, तु, ते)
पराक्रम र प्रसिद्धि बढाउने साता छ । तेस्रो घरमा रहेको चन्द्रमाका साथमा साताको प्रारम्भ भएको छ भने पाँचौं अर्थात् बुद्धिक्षेत्रमा चन्द्रमाको प्रवेश हुँदा साताको समाप्ति हुनेछ । पठनपाठन र बौद्धिक गतिविधिका कारण मानसम्मान र प्रतिष्ठामा बढोत्तरी हुनेछ । दीर्घकालिक योजनालाई मूर्त बनाउन चिन्तन महत्त्वपूर्ण बन्न सक्छ । अध्ययन, अध्यापन र लेखनकार्यमा उच्च सफलता प्राप्त हुने छ । व्यावहारिक र प्राविधिक काममा विशेष सफलता प्राप्त हुने समय छ । बौद्धिक क्रियाकलापप्रति झुकाव बढ्ने छ । भाइबहिनी र छोराछोरीले सहयोग गर्नेछन् । साताको मध्यभागमा चौथो भावमा चन्द्रमा रहने भएकाले घरगृहस्थीमा धेरै समय खर्चनु पर्नेछ । वैदेशिक रोजगारी गर्नेेहरूले घरायसी कुरा सम्झेर समय बिताउने छन् । आकस्मिक रूपमा स्वास्थ्यमा सानोतिनो समस्या पनि आउनसक्छ, सचेत हुनुपर्छ ।

बृश्चिक (तो, ना, नि, नु, ने, नो, या, यि, यु)
यो साता तपाईंले कुनै नयाँ ठाउँमा निवेश र लगानीको वातावरण बनाउने समय छ । नातेदार र कुटुम्बले काममा सहयोग गर्नेछन् । प्रतियोगितात्मक क्रियाकलापमा सफल हुनुहुने छ । मित्रशक्ति र कुटुम्बबाट साथसहयोग पाइने छ । कृषि र पशुपालनका कार्यतिर मन आकर्षित बन्नेछ । शारीरिक परिश्रम गर्ने समय हो, यस साताको । तर साताको अन्त्यमा साथीहरूसित मनोरञ्जनको अवसर जुर्नेछ । व्यापार गर्नेले यो साता सोचेजस्तै लाभ लिन सक्नेछन् । कतै आर्थिक लगानी गर्नुपर्ने हुनसक्छ । साताको अन्त्यमा घरायसी कामधन्दा र पारिवारिक आवश्यकता पूर्तिका लागि खट्नु पर्ने छ । छरछिमेकमा कसैसँग व्यर्थमा वादविवाद हुनसक्छ, त्यसैले शुक्रबार र शनिबार तपाईंले बोल्दै नबोलेको जाति हुन्छ । प्रेमसम्बन्ध र रतिरागका कारण निराशा भोग्नु पर्ने समय छ भने सन्तानपक्षमा पनि समय र लगानी बढाउनु पर्ने समय चल्दैछ ।

धनु (ये, यो, भ, भि, भु, ध, फा, ढ, भे)
यो साता तपाईंको राशिबाट पहिलो, दोस्रो र तेस्रो घरमा चन्द्रमाले भ्रमण गर्ने भएकाले राम्रो समय छ, त्यसैले काम गर्न जाँगर चल्नेछ । प्रेमको बन्धनमा बाँधिने बेला छ । आम्दानीमा कमी हुने छैन । शुभ समाचार प्राप्त हुनाले मन फुरुङ्ग हुनेछ । समयलाई उपयोग गर्नसके राम्रो फाइदा लिन सकिने छ । उत्साहवर्द्धक समय छ । कतै रमाइलो यात्रामा निस्कन सक्नुहुन्छ । आतिथ्यपूर्ण सम्मान र मिठो भोजनको प्राप्ति हुनेछ । व्यवसाय र पेसाबाट राम्रै प्रतिफल प्राप्त हुनेछ, चिताएभन्दा बढी कमाउने योग छ । समय राम्रो छ । सामाजिक काममा संलग्न हुनुपर्ला । धार्मिक वा सामाजिक सेवाका काममा प्रशंसित हुने अवसर प्राप्त हुनेछ । दाजुभाइ वा नजिकका मित्रबाट विशेष सहयोग र सुख प्राप्त हुने देखिन्छ । त्यसैले यो साता उत्तम समय छ ।

मकर (भो, ज, जि, खि, खु, खे, खो, गा, गि)
तपाईंको राशिबाट बाह्रौं भावमा चन्द्रमा रहेका वेलामा साताको प्रारम्भ भएको छ, त्यसैले खर्चबर्चलाई व्यवस्थित तुल्याउन तपाईंले निकै खट्नु पर्ने समय हो, यो साता । बन्दव्यापार र व्यवसायमा समय दिन सकिंदैन र सोचेबमोजिम काम नबन्न सक्छ । धैर्यले संयमताका साथमा काम लिने समय छ । उता छर–छिमेकमा वा परिवारकै सदस्यका बीचमा असमझदारी बढ्ने योग छ । प्रतियोगिता र प्रतिस्पर्धामा पनि त्यति राम्रो संकेत छैन, तर मङ्गलबार आफ्नै राशिमा चन्द्रमाको प्रवेश हुँदैछ , त्यसपछिको समय सकारात्मक रहने छ । कुनै नयाँ उद्योगधन्दा वा व्यवसायको थालनी गरेमा व्यवहारिक रूपमा फाइदा पुग्नेछ । उपलब्धीमूलक यात्रा हुने योग छ, संयमता र धैर्यतालाई त्याग्नु हुँदैन । घरायसी मामिलामा समय दिन नसक्नाले केही केही धमिलोपन आउन सक्छ । साताको अन्त्यमा सम्पति प्राप्त गर्ने सम्भावना छ । पारिवारिक जीवन संतोषप्रद हुनेछ । साझेदार वा सहयोगीको सङ्गतले लाभ प्राप्त हुने सम्भावना छ । व्यस्त समयचर्या कायम हुनेछ । परदेश वा विदेशबाट राम्रो समाचार प्राप्त हुनेछ ।

कुम्भ (गु, गे, गो, सा, सि, सु, से, सो, द)
साताको प्रारम्भ र अन्त्य अत्यन्त सकारात्मक रहने छ भने साताको मध्यभागमा खर्चबर्चलाई व्यवस्थित तुल्याउन निकै दौडधूप गर्नुपर्ने समय चल्दैछ । साताको प्रारम्भमा विगतमा भएका राम्रा क्रियाकलापको स्मरण हुनेछ । मेवा मिष्टान्न र परिकार मिल्नेछ, राज्यपक्षबाट वा सरकारी कामबाट फाइदा हुनेछ । भाइबहिनीका तर्फबाट खुसीको खबर प्राप्त हुने वा तिनका उन्नतिप्रगतिको अवसर सिर्जना हुने समय छ । मङ्गलबारपछि बिहीबारसम्म बाह्रौं भावमा चन्द्रमा रहने छ, उक्त समय अनुकूल हुनेछैन । सुखी जीवन व्यतीत गर्न मन लालायित हुनेछ । भोगविलास र शृङ्गारिक सामाग्री खरिद गर्न धन खर्च हुनेछ । उता अभिभावक वर्गसँगको सम्बन्धमा तिक्तता आउन सक्छ । घुमघाम र मनोरञ्जनका क्रममा निराशा भोग्नु पर्छ । बिहीबारपछि तपाईंको राशिमा चन्द्रमाले प्रवेश गर्नेछ, नियमित तथा दैनिक कामधन्धा र व्यवसायबाट राम्रो फाइदा हुनेछ । गुमेको वा सापटीमा गएको धन फिर्ता आउनेछ । बौद्धिक र प्राज्ञिक क्षेत्रमा राम्रो छ । तर त्यसवेलामा क्रोध, प्रतिशोध, रिसराग र उत्तेजना माथि नियन्त्रण गर्नु राम्रो हुनेछ ।

मीन (दि, दु, थ, झ, ञ, दे, दो, च, चि)
यो साता कर्मक्षेत्रमा रहेको चन्द्रमाका साथमा साताको प्रारम्भ भएको छ । मातापिताको स्वास्थ्यमा सुधार आउने छ । लामो दूरीको लाभदायक यात्राको सम्भावना देखिंदैछ । सामाजिक र पारिवारिक सम्बन्ध सुदृढ हुनेछ । प्रतिस्पर्धी परास्त हुनेछन् । आम्दानी बढ्नेछ । सामाजिक कामबाट प्रशंसा प्राप्त हुनेछ । भेटघाट र मनोरञ्जनमा समय व्यतीत हुनेछ । छोराछोरीको स्वास्थ्य एवं पढाइप्रति जिम्मेवारी बोध हुनेछ । समाजमा बुद्धिको प्रशंसा हुनेछ । घरपरिवार र नातेदारमा सुमधुर सम्बन्ध कायम हुनेछ । तर साताको अन्त्य अनुकूल छैन, बाह्रौं भावमा चन्द्रमा जाने भएकाले खर्चको मात्रा ह्वात्तै बढ्नसक्छ । उता साताको प्रारम्भमा गरिएका प्रशासनिक कामहरुबाट झैझमेला वा आरोप व्यहोर्नु पर्ने परिस्थिति बन्नसक्छ । त्यसैले सुरुमा काम गर्दा निकै सचेत र होसियार हुनु राम्रो हो । प्रेम सम्बन्धमा तिक्तता आउने योग छ । साताको अन्त्यमा लामो दूरीको यात्रा पनि हानीकारक बन्नसक्छ, अतः कतै लामो यात्राको योजना छ भने बिहीबारअघि नै राम्रो हुनेछ ।

  • सोमवार, माघ २९, २०७४ मा प्रकाशित