१३ असार, काठमाडौं ।सन् २०२२ मा विश्वकप फुटबलको आयोजना कतार गर्न ठूलो भ्रष्टाचार भएको जर्मन मिडियाले दाबी गरेको छ ।

 

जर्मनीको बिल्ड समाचारपत्रको दाबी छ कि उसले फिफाका स्वतन्त्र न्यायिक जाँचकर्ता माइकल गार्सियाले २०१४ मा तयार पारेको प्रतिवेदन फेला पारेको छ । बिल्डले पाएको प्रतिवेदनमा फिफाका एक अधिकारीकी १० वर्षीया छोरीको खातामा २ मिलियन डलर ट्रान्सफर गरिएको विवरणसमेत सामेल छ ।

विश्वकपका लागि विडिङ प्रक्रियाबारेको प्रतिवेदन बिरोधका बीच हस्तान्तरण गरेपछि गार्सियाले २०१४ को डिसेम्बरमा फिफा छाडेका थिए । अमेरिकी वकिलले नेतृत्वको अभावको आरोप लगाउँदै फिफा छाडेको बताएका छन् र, उनले आफ्नो रिपोर्ट कानूनी प्रक्रिया पूरा गरी प्रकाशित गर्न अखबारलाई अनुमति दिएका छन् ।

प्रतिवेदनभित्रको ४२ पेजको संस्करणमा कतारलाई विश्वकप आयोजना गर्न दिने निर्णयमा भएको भ्रष्टाचारको फेहरिस्त प्रस्तुत गरिएको दाबी छ । विल्ड अखवारले भनेको छ कि मंगलबार गार्सियाको ४०३ पेज लामो पूरै प्रतिवेदन प्रकाशित गर्नेछ ।

गार्सियाको रिपोर्टमा मूख्यत दुई कुरा रहेको दाबी पत्रिकाको छ ।

१. २०१८ र २०२२ को विश्वकप आयोजनाको अधिकार प्रत्यायोजनका लागि मतदान हुनुभन्दा केहि समयअघि फिफाका तीन कार्यकारी सदस्य कतारी फुटबल फेडेरेसनले उपलब्ध गराएको निजी जेटमा पार्टीका लागि रियो दि जेनेरियो प्रस्थान गरेका थिए ।

२. कतारको अस्पायर एकेडेमीले मतदानको अधिकार रहेका फिफा सदस्य मुलुकमा हेरफेर गरी निर्णायक तरिकाबाट फसाइएको थियो ।

गार्सियाका प्रतिवेदन पाएको दाबी गर्ने बिल्डका पत्रकार पिटर रोसवर्गले फेसबुक पोष्टमार्फत भनेका छन् कि, ‘यो प्रतिवेदनले प्रमाणित गर्दैर्न कि २०१८ र २०२२ को विश्वकप खरिदबिक्री भएको थियो ।’

नौ आकांक्षी मुलुकलाई पछि पार्दै कतारले सन् २०२२ मा हुने विश्वकप फुटबल आयोजनाको अख्तियारी सन् २०१० मा पाएको थियो । त्यही समयमा सन् २०१८ मा रुशले विश्वकप आयोजना गर्ने निश्चित भएको थियो ।

  • बुधबार, असार १४, २०७४ मा प्रकाशित